Улаанбаатар хотын хүн амын хэт төвлөрлийг сааруулах, нэг төвт хөгжлийн тогтолцооноос олон төвт хотын бүтэц рүү шилжих, агаар, хөрс, орчны бохирдлыг бууруулах зорилгоор Нийслэлийн Сонгинохайрхан дүүргийн 5, 6, 7 дугаар хорооны нутаг дэвсгэрт “Ханын материал орон сууцжуулах төсөл”-ийг хэрэгжүүлж байгаа билээ.
Төслийг 2025-2032 онд хоёр үе шаттайгаар хэрэгжүүлэх бөгөөд нийт 20.7 га талбайг хамарч, 3000 айлын орон сууц бүхий орчин үеийн, иж бүрэн төлөвлөлттэй хотхон байгуулах юм. Энэхүү төсөл нь зөвхөн орон сууц барихаас гадна нийгмийн дэд бүтэц, ногоон байгууламж, худалдаа үйлчилгээ, боловсрол, спортын цогц шийдлийг нэг дор төлөвлөснөөрөө онцлогтой.
Төслийн нэгдүгээр шатанд 12.6 га талбайд 1800 айлын орон сууц барих бөгөөд хоёрдугаар шатанд 8.1 га талбайд 1200 айлын орон сууцыг ашиглалтад оруулснаар нийт 3000 өрх ая тухтай, эрүүл, аюулгүй орчинд амьдрах боломж бүрдэх юм.
Эхний ээлжийн 1800 айлын орон сууцны төслийн гүйцэтгэгчээр “Материалимпэкс” ХК, “Материалимпэкс констракшн” ХХК болон “Конконсалтинг” ХХК-ийн түншлэл шалгарсан. Одоогоор төслийн эх зураг батлагдаж, ажлын зураг төсөл бүрэн боловсруулагдсан бөгөөд эхний ээлжийн 6 блокын барилга угсралтын ажил эхэлсэн.
Төслийн хүрээнд 5-14 давхар бүхий 21 орон сууцны барилга барихаас гадна иргэдийн өдөр тутмын хэрэгцээг хангах нийгмийн болон үйлчилгээний 7 төрлийн байгууламжийг цогцоор нь байгуулахаар төлөвлөжээ. Тухайлбал 280 хүүхдийн хүчин чадалтай хоёр цэцэрлэг, 400 хүүхдийн суудалтай сургалт, хөгжлийн төв болон оффисын зориулалттай барилга, 1500 автомашины ил болон дулаан зогсоол, худалдаа үйлчилгээний төв, үзвэр үйлчилгээний цогцолбор, спортын байгууламжуудыг барих юм. Мөн төслийн нийт талбайн 60 хувийг нийтийн эзэмшлийн ногоон байгууламж, цэцэрлэгт хүрээлэн, хүүхдийн тоглоомын талбай, амралтын бүс, явган хүний болон дугуйн зам, гэрэлт гудамж зэргийг төлөвлөжээ.
“Ханын материал орчмын гэр хорооллыг орон сууцжуулах” төсөл нь ашиглалтад орсноор хотын төврүү чиглэсэн хөдөлгөөнийг бууруулж, авто замын ачааллыг багасгаснаар түгжрэлийг буруулах, 3000 яндан болон нүхэн жорлон байхгүй болсноор агаар, хөрсний бохирдол тодорхой хэмжээнд буурах юм.
