Дүүжин замын тээврийн системийн аюулгүй ажиллагааг хангах хүрээнд кабин бүд 750 кг ачаатай системийн туршилтыг өнөөдрөөс эхлүүллээ. Туршилтын хүрээнд өмнө нь кабинуудыг ачаагүй нөхцөлд шалгаж, үндсэн хөдөлгүүр, буудал доторх мэдрэгчүүд, аюулгүй ажиллагааны систем, ган татлагын мэдрэгчүүд болон тоормосны систем болон үндсэн системийн хэвийн ажиллагааг туршиж шалгасан бол өнөөдрөөс бүрэн ачаатай нарийвчилсан туршилт эхэлж байна. Энэхүү туршилт нийт 10 орчим хоног үргэлжлэх бөгөөд 98 кабин тус бүрд 750 кг жинтэй элс хийж системийн бүхий л тоног төхөөрөмжүүдийн ажиллагааг шалгана. Ингэснээр дүүжин замын тээврийн системийг бодит ачааллын нөхцөлд ажиллуулах үеийн үзүүлэлтүүдийг үнэлэх юм.
Туршилтын үеэр кабинууд хоёр тийш болон дээш, доош хүчтэй савлах тохиолдол гарч болзошгүй. Энэ нь системийн тогтвортой байдал, аюулгүй ажиллагааг шалгах зорилгоор зориудаар үүсгэж буй хэвийн туршилтын нэг хэсэг болохыг “Пома групп”-ийн төслийн дэд менежер Алексис Грессел онцоллоо. Тэрбээр “Туршилтын үеэр кабинуудыг зориудаар савлуулж, системийн аюулгүй ажиллагааг шалгаж байгаа. Энэ нь дүүжин замын тээвэр ашиглалтад орсны дараа ийм төрлийн савлагаа гарахгүй тулд хийгдэж байгаа чухал туршилтуудын нэг юм. Мөн ачаатай туршилтын хүрээнд кабины жингүй үеийн туршилтаар шалгасан бүх мэдрэгч, тоног төхөөрөмж болон инженерийн системүүдийг дахин нягталж, аюулгүй ажиллагааны үзүүлэлтүүдийг баталгаажуулна” гэв.
Түүнчлэн Францын “Bureau Veritas” группийн мэргэжилтнүүд Монголд ажиллаж, хөндлөнгийн инженерийн аудит хийнэ. Тус аудит нь төслийн зураг төсөл батлагдсан зураг, норм стандарт мөрдсөн эсэх, ашигласан материал болон гүйцэтгэлийн чанар, инженерингийн системийн аюулгүй байдал, ашиглалтын үеийн болзошгүй эрсдэлийг үнэлэх аж.
