Улаанбаатар хотын нийтийн тээвэрт “SkyShuttle” систем нэвтрүүлэхээр БНХАУ-ын BYD компанийн төлөөлөлтэй гурав дахь удаагийн уулзалтаа хийсэн талаар хотын дарга Б.Пүрэвдагва мэдээллээ.
Уулзалтаар төслийн техник, эдийн засгийн үндэслэлийг 2026 оны арванхоёрдугаар сард багтаан боловсруулж, 2027 оны гуравдугаар сараас барилга угсралтын ажлыг эхлүүлэхээр талууд урьдчилсан байдлаар тохиролцсон байна.
Өмнө нь буюу энэ оны наймдугаар сард BYD компанийн төлөөлөгчид SkyShuttle төслийг Улаанбаатарт хэрэгжүүлэх боломжийг хотын удирдлагад танилцуулжээ. Тухайн үед төслийг хоёр жилийн хугацаанд хэрэгжүүлэх, тээврийн хэрэгслийг −40 хэмийн нөхцөлд ажиллуулах боломжтой гэж компанийн талаас мэдээлж байв.
Улмаар COP17 бага хурлын үеэр нийслэл BYD компанитай харилцан ойлголцлын санамж бичиг байгуулсан. Уг санамж бичигт SkyShuttle нэвтрүүлэхээс гадна цахилгаан автомашины хэрэглээг нэмэгдүүлэх, түргэн цэнэглэх “Ногоон өртөө” байгуулах, эрчим хүчний батарей хуримтлуур нэвтрүүлэх чиглэлүүд багтжээ.
SkyShuttle нь тусгай өргөгдсөн замаар зорчдог, батарейд суурилсан, автомат жолоодлоготой нийтийн тээврийн систем юм. Үйлдвэрлэгчийн ангиллаар бага багтаамжийн тээвэрт хамаарах бөгөөд том хотын салбар шугам, хорооллуудыг тээврийн зангилаатай холбоход ашигладаг.
Одоогоор төслийн маршрут, буудлын тоо, нийт өртөг болон санхүүжилтийн эх үүсвэрийг тодорхойгүй байна. Ямартай ч нийслэлчүүд нэгэн шинэ нийтийн тээврийн хэрэгслийн нэртэй үлдэх үү, бодит бүтээн байгуулалтта үлдэх үү гэдгийг цаг хугацаа харуулна.
