“Нэгдсэн төслийн удирдлагын газар” ОНӨТҮГ-ын нийт инженер, албан хаагчид өнөөдөр буюу 2026 оны 9 дүгээр сарын 12-ны өдөр Дүүжин замын тээвэр болон Нүхэн гарц төслийн талбайд ажиллалаа. Нийслэлд хэрэгжиж буй томоохон дэд бүтцийн төслүүдийн ажлын уялдаа, барилга угсралтын үе шат, техникийн шаардлага, норм, дүрэм, стандартын хэрэгжилтийн талаар инженер, техникийн ажилтнууд санал солилцож, тулгамдаж буй асуудал болон шийдвэрлэх арга хэмжээний талаар хэлэлцсэн.
Дүүжин замын тээвэр төслийн хувьд, өнөөдрийн байдлаар хоёр буудлын барилгын дотоод засал, системийн тохируулгын ажил хийгдэж байна. Барилга угсралтын ажил бүрэн дууссаны дараа системийн туршилт, тохируулга, зүгшрүүлэлтийн ажлыг гүйцэтгэнэ. Энэ хугацаанд зорчигч тээвэрлэхгүй бөгөөд ачааллын туршилтыг ус болон шуудайтай элс ашиглан, кабин бүрийн багтаамжид дүйцэх 750 кг жингээр шат дараатай хийж гүйцэтгэх юм.
Улаанбаатар хотын авто замын түгжрэлийг бууруулах, төмөр замаар тусгаарлагдсан хотын хэсгүүдийн авто замын холболтыг сайжруулах, хөдөлгөөний нэвтрүүлэх чадварыг нэмэгдүүлэх зорилгоор “Төмөр зам доогуур авто замын нүхэн гарц” төслийг үе шаттайгаар хэрэгжүүлж байна. Төслийн хүрээнд барилга угсралтын ажлын өмнөх бэлтгэл, газар чөлөөлөлт, инженерийн шугам сүлжээний шилжүүлэлт, зам барилгын болон бүтээцийн ажлуудыг үе шаттай зохион байгуулан гүйцэтгэж байна. Одоогийн байдлаар төслийн нийт хэрэгжилт 74 орчим хувьтай байгаа бөгөөд цаашид үлдсэн барилга угсралт, инженерийн байгууламж, авто замын бүтээц болон холбогдох тохижилтын ажлыг технологийн дараалал, зураг төсөл, техникийн шаардлагын дагуу үргэлжлүүлэн гүйцэтгэхээр ажиллаж байна
