Засгийн газрын болон нийслэлийн томоохон бодлогын баримт бичгүүдэд тусгагдсан “Эмээлт эко аж үйлдвэрийн парк байгуулах” зорилтыг 2025–2028 онд хэрэгжүүлэхээр төлөвлөн ажиллаж байна. Тус парк нь Хан-Уул дүүргийн Шар хөвийн хоолойд, хотын төвөөс ойролцоогоор 30 км зайд байрлах 539 га талбайд байрлана.
Парк ашиглалтад орсноор арьс шир, ноос, ноолуур, мах болон малын гаралтай бусад түүхий эдийг нэг дор төвлөрүүлэн боловсруулах үйлдвэрлэл, логистик, агуулах, дэд бүтцийн нэгдсэн кластер бий болно. Тус парк нь жилд 7.5 сая ширхэг арьс шир, 4.6 мянган тонн заводын ноос, 5.8 мянган тонн ноос, 3.0 мянган тонн ноолуур, 2.5 мянган тонн ээрмэл бүтээгдэхүүн, 25.5 мянган тонн мах 98.4 мянган тонн дайвар түүхий эд боловсруулах хүчин чадалтай байхаар төлөвлөгдсөн. Түүнчлэн 43 мянган тонн багтаамжтай хөргүүртэй агуулах, 5.6 мянган тонн гүн хөлдөөх агуулах, 6.2 мянган тонн дайвар бүтээгдэхүүний агуулах, 11.8 мянган тонн хүнсний агуулах, 4.1 мянган тонн ноос, ноолуурын агуулах, гаалийн баталгаат агуулах зэрэг логистикийн дэд бүтцийг бий болгохоор төлөвлөгдсөн байна.
Ингэснээр Монгол Улс малаас гарах түүхий эдийг зөвхөн түүхий хэлбэрээр экспортлох бус, боловсруулах үйлдвэрлэлээр дамжуулан нэмүү өртөг шингээж, экспортын бүтээгдэхүүн болгон гаргах боломж нээгдэнэ.
Эмээлт паркийг эрчим хүчээр хангах 24 MBт хүчин чадалтай дулааны цахилгаан станц нь 7.4 га талбайд байрлах нийт 38 үндсэн болон туслах барилга байгууламжаас бүрдэх юм. Үүнд зуухны байр, турбин генератор, түлш хадгалах байгууламж, ус бэлтгэлийн цех, насосны станц, цахилгаан дэд станц зэрэг гол объектууд зэрэг болно. Энэхүү ДЦС нь жилд 156 сая кВт.ц орчим цахилгаан, 265.6 мянган Гкал дулааны эрчим хүч үйлдвэрлэх тооцоотой бөгөөд төвийн эрчим хүчний системд илүүдэл эрчим хүчийг нийлүүлэхээр төлөвлөгдсөн.
6,700м3 хүчин чадалтай бохир ус цэвэрлэх байгууламжийн хувьд паркт үйл ажиллагаа явуулах арьс шир, ноос, ноолуур, мах, малын гаралтай дайвар бүтээгдэхүүн боловсруулах үйлдвэрүүдээс ялгарах үйлдвэрийн бохир ус болон паркийн бүсэд баригдах үйлдвэр, үйлчилгээний байгууллагуудын ахуйн бохир усыг цуглуулан, цэвэрлэх зориулалттай бие даасан байгууламж байх ба цаашид 20,000 м3 болон өргөжих юм. Паркийн үйлдвэрүүдийн бохир усыг нэгдсэн системээр цэвэрлэх байгууламжтай болсноор үйлдвэр бүр тус тусдаа бохир усны асуудлаа шийдэх шаардлага багасч, байгаль орчны хяналт, стандартыг хэрэгжүүлэх боломж нэмэгдэнэ.
