ЕРӨНХИЙ САЙДЫН ХАМААРАЛ БҮХИЙ СУРГУУЛИЙН ТАЛААР АНХ ЯРИЛЦЛАГА ӨГСӨН Т.НЯМ-ОЧИР ГЭЖ ХЭН БЭ?

2026 оны төсвийн тодотголд нийслэлийн сургуулиудын ачааллыг бууруулах, “гэрт ойрхон сургууль” бий болгох чиглэлээр 50 тэрбум төгрөг тусгасан нь улс төрийн маргааны гол сэдэв болоод байна.Үүнээс хувийн гурван сургуульд 7.1 тэрбум төгрөгийн дэмжлэг, тоног төхөөрөмж олгохоор төлөвлөсөн гэх мэдээллийг Боловсролын яамны Төрийн нарийн бичгийн дарга Т.Ням-Очир ярилцлагадаа анх дурджээ. Тэрээр “Их Засаг кинг”, “Шинэ санаа”, “Империал” сургуулийг нэрлэсэн бөгөөд “Их Засаг кинг” нь Ерөнхий сайд Н.Учралын гэр бүлийн хамаарал бүхий сургууль гэх асуудал үүний дараа олны анхаарлын төвд орсон юм.

Гэхдээ Т.Ням-Очир дараа нь өгсөн тайлбартаа улсын төсвийн мөнгөөр хувийн сургуульд тоног төхөөрөмж, тавилга авч өгөх эрх зүйн боломжгүйг онцолжээ. Мөн Боловсролын яамны ажлын хэсэг “Их Засаг кинг” сургуульд хамтран ажиллах санал тавьсан ч тухайн сургууль саналыг хүлээж аваагүй гэж мэдэгдсэн байна.Түүний тайлбарласнаар, төсвийн 50 тэрбум төгрөгийг хотхон, хороололд бага сургуулийн байр түрээслэх, сургалтын орчныг иж бүрэн тохижуулах, төрөлжсөн ахлах сургууль байгуулах зэрэг чиглэлд зарцуулахаар тооцжээ.

Гэвч дээрх мэдээллийн дараа Сангийн сайд З.Мэндсайхан Т.Ням-Очирыг дуудаж, “Яагаад мэдэхгүй зүйлээ ярьж байгаа юм бэ” гэж хэлсэн тухайгаа олон нийтэд мэдэгдсэн. Ингэснээр төсвийн саналыг хэн боловсруулсан, гурван сургуулийг ямар шалгуураар нэрлэсэн, 7.1 тэрбум төгрөг яг юунд зарцуулагдах байсан зэрэг асуудал тодорхойгүй хэвээр үлдлээ.

Тэгвэл Т.Ням-Очир гэж хэн бэ?

Төмөр-Очирын Ням-Очир нь боловсролын салбарт 24 орчим жил ажилласан төрийн мэргэшсэн албан хаагч юм. Тэрээр химийн багшаас ажлын гараагаа эхэлж, дүүрэг, нийслэл, яам, Засгийн газрын агентлагт шатлан ажиллажээ.

* 2002–2003 онд Ховд аймгийн 10 жилийн III сургуульд химийн багш;

* 2003–2004 онд Нийслэлийн Хүүхэд, залуучуудын хөгжлийн газарт мэргэжилтэн;

* 2005–2008 онд Сүхбаатар дүүргийн ЗДТГ-т боловсролын асуудал хариуцсан мэргэжилтэн;

* 2008–2011 онд Сүхбаатар дүүргийн Боловсролын хэлтсийн ахлах мэргэжилтэн;

* 2011–2012 онд Нийслэлийн Боловсролын газрын Хяналт-шинжилгээ, үнэлгээний албаны дарга, газрын дарга;

* 2012–2017 онд Чингэлтэй дүүргийн Боловсролын хэлтсийн дарга;

* 2017–2018 онд Чингэлтэй дүүргийн Нийгмийн хөгжлийн хэлтсийн дарга;

* 2018 оноос Боловсролын яаманд сургуулийн өмнөх болон ерөнхий боловсролын бодлого хариуцсан газрын дарга;

* 2022–2026 онд Боловсролын ерөнхий газрын дарга;

* 2026 оны дөрөвдүгээр сарын 29-нөөс Боловсролын яамны Төрийн нарийн бичгийн даргаар ажиллаж байна.

Төрийн албан хаагч улс төрийн золиос болох ёсгүй

Энэ асуудлыг зөвхөн “хэн буруу мэдээлэл өгсөн бэ” гэдгээр хязгаарлаж болохгүй. Төсвийн саналыг боловсруулах, сургуулиудыг сонгох, зарцуулалтыг батлах үйл явцад яам, Сангийн яам болон Засгийн газрын хэд хэдэн байгууллагууд оролцдог. Иймд бүх хариуцлагыг мэдээлэл өгсөн нэг төрийн албан хаагчид тохох нь асуудлын бодит эзнийг бүдгэрүүлэх эрсдэлтэй.

Т.Ням-Очирын өгсөн мэдээлэл ташаа байсан бол ямар тоо, ямар үндэслэл нь зөрүүтэй байсныг баримтаар залруулах ёстой. Харин яамны ажлын хэсгийн судалсан, боловсруулсан саналыг танилцуулсных нь төлөө түүнийг улс төрийн маргааны золиос болгож болохгүй.

Нөгөө талаар төрийн өндөр албан тушаалтан олон нийтэд өгөх мэдээллээ нягталж, төсвийн дүн, сонгосон байгууллага болон шийдвэрийн үе шатыг тодорхой тайлбарлах үүрэгтэй.