Хүннү хотын ирээдүйн хүн амын өсөлт, хот байгуулалтын хэрэгцээг хангах зорилготой хоногт 3,000 шоо метр бохир ус цэвэрлэх хүчин чадалтай цэвэрлэх байгууламжийн бүтээн байгуулалт эрчимтэй үргэлжилж байна. Төслийн хүрээнд нийт 11 цогцолбор барилга байгууламж барихаар төлөвлөсөн бөгөөд одоогийн байдлаар есөн барилгын гүйцэтгэл 70-80 хувьд хүрчээ.

Тус төслийг “Компорт Импекс” ХХК нь 2025 оноос хэрэгжүүлж эхэлсэн бөгөөд 2027 оны дөрөвдүгээр улиралд багтаан ашиглалтад оруулахаар төлөвлөжээ. Нийт 400 мянган ам метр талбайг хамрах уг цогцолборын хүрээнд механик цэвэрлэгээний барилга, биологийн цэвэрлэгээний барилга, захиргааны болон үйлдвэрийн барилга, цахилгааны дэд өртөө, харуул хамгаалалтын байр зэрэг 11 үндсэн барилга байгууламжийг барьж байна.
“Хүннү хотын хөгжлийн корпорац” ХХК-ийн Ерөнхий инженер Д.Жаргал хэлэхдээ “Төслийн эхний шатанд хоногт 3,000 шоо метр бохир ус цэвэрлэх хүчин чадалтай байхаар төлөвлөсөн цаашид Хүннү хотын хүн амын өсөлт, хот байгуулалтын хэрэгцээтэй уялдуулан хүчин чадлыг үе шаттайгаар нэмэгдүүлж, хоногт 20,000 шоо метр бохир ус цэвэрлэх боломжтойгоор төлөвлөсөн. Мөн цэвэрлэх байгууламжийн үндсэн барилгаас гадна цэвэрлэгдсэн усны 8.1 километр урт шугам сүлжээний ажил давхар хийгдэж байна. Уг шугам сүлжээний ажлын гүйцэтгэл одоогоор 60 орчим хувьтай үргэлжилж байгаа” гэлээ.

Цэвэрлэх байгууламж ашиглалтад орсноор Хүннү хотын 6,000 орчим өрхийн 21,600 гаруй хүн амын бохир усыг цэвэрлэн зайлуулах боломж бүрдэх юм. Ингэснээр шинээр байгуулагдаж буй хотын инженерийн дэд бүтцийн найдвартай ажиллагааг хангах, хүн амын ая тухтай, эрүүл аюулгүй амьдрах орчныг бүрдүүлэхэд чухал дэмжлэг үзүүлнэ. Түүнчлэн бохир усыг зохих технологийн дагуу цэвэрлэж, байгаль орчинд үзүүлэх сөрөг нөлөөллийг бууруулах нь хотын урт хугацааны тогтвортой хөгжлийн үндсэн нөхцөлүүдийн нэг юм.










