Сошиал орчинд “Удган Булнай” нэрээр танигдсан Б.Булнай сүүлийн өдрүүдэд өөрт нь дарамт шахалт үзүүлсэн гэх мэдэгдлээрээ олон нийтийн анхааралд орлоо. Түүний тухай хувийн намтар, мэргэжлийн мэдээлэл нээлттэй эх сурвалжид хязгаарлагдмал байна. Харин компанийн бүртгэлд Баярмагнайн Булнай нь “Ариун-Ур” ХХК-ийн хувь эзэмшигчдийн нэгээр бичигджээ. Тус компанид Ганбаатарын Ганчимэг мөн хувь эзэмшдэг. Б.Булнай хувь эзэмшдэг “Ариун-Ур” ХХК-ийн 2026 оны тендерийн бүртгэлд дөрвөн ажил “шалгарсан” байна.Тэдгээрийн хоёр нь цагдаагийн байгууллага, хоёр нь шүүхийн байгууллагын байр, байгууламжийн засварын ажил байна.Тухайлбал, Баянзүрх дүүргийн цагдаагийн I, II, III дугаар хэлтсийн 281 сая төгрөгийн төсөвт өртөгтэй засварын ажил, Цагдаагийн ерөнхий газрын Төмөр зам дахь цагдаагийн газрын 191.9 сая төгрөгийн төсөвт өртөгтэй шугам, сүлжээ болон бусад засвар үйлчилгээний ажилд тус компани шалгарчээ. Шүүхийн байгууллагын хувьд Нийслэлийн Эрүүгийн хэргийн давж заалдах шатны шүүхийн барилгын 213 сая төгрөгийн төсөвт өртөгтэй засвар, мөн тус шүүхийн Тамгын газрын 81 сая төгрөгийн төсөвт өртөгтэй урсгал засварын ажилд шалгарсан байгаа нь баримтаар нотлогдож байна.Эдгээр дөрвөн ажлын төсөвт өртөг нийлээд 766.9 сая төгрөг болж байна.
ADVERTISEMENT
