Н.УЧРАЛ УРАГШГҮЙ 2 САЙДААСАА САЛАХ УУ?

Ерөнхий сайд Н.Учралын Засгийн газрын хоёр сайдын асуудал олон нийтийн анхаарлын төвд орлоо.

УИХ-ын гишүүн М.Нарантуяа-Нара Гэр бүл, хөдөлмөр, нийгмийн хамгааллын сайд Т.Аубакирыг чөлөөлөх саналыг гаргасан. Баян-Өлгийд Казахстаны консулын газар байгуулах асуудлаас эхэлсэн маргаан үндэстэн, ястны асуудал болон хурцдаж, нийгмийг талцуулаад байна. Мөн Баян-Өлгийчүүд хуулийн цоорхойг ашиглан халамж, тэтгэмж илүү авч завшдаг гэх асуудлууд ч яригдаж байна. Ийм байхад нийгэм хамгааллын сайд нь тус аймгаас сонгогдсон хүн байх нь буруу гэж үзэх хүмүүс олон бий.

Харин Хууль зүй, дотоод хэргийн сайд С.Амарсайхантай холбоотой илүү ноцтой мэдээлэл цацагдав. Иргэн Б.Булнай цагдаагийн алба хаагчид өөрт нь дарамт үзүүлж, “С.Амарсайхантай холбоогүй” гэсэн агуулгатай бичлэг нийтлүүлэхийг шаардсан хэмээн мэдэгдсэн. Мөн бичлэг хийвэл шалгагдаж буй хэргийг нь хааж өгнө гэж хэлсэн нь камерын бичлэгт үлдсэн гэжээ. Ерөнхий сайд энэ асуудлыг зүгээр өнгөрөөхгүй гэдгээ мэдэгдээд буй.

Нэг сайдын асуудал үндэстэн хоорондын маргаантай, нөгөө сайдынх хууль сахиулах байгууллагыг хувийн эрх ашгийн төлөө ашигласан байж болзошгүй гэх ноцтой асуудлууд үүсээд байна.

Олон нийтийн эгдүүцлийг хүргэж байгаа 2 сайдын асуудалд Ерөнхий сайд Н.Учрал дуугүй өнгөрвөл Засгийн газрын хариуцлагын асуудал болж хувирч мэдэхээр байна.