Монгол Улсын Ерөнхийлөгч У.Хүрэлсүх албан тушаалаа хүлээлгэн өгч, нэр төрөө сэргээлгэхээр болсноо мэдэгдсэн нь түүний улс төрийн замнал дахь өмнөх шийдвэрүүдийг дахин анхаарлын төвд орууллаа. Тэрбээр улс төрийн карьерынхаа хугацаанд УИХ-ын гишүүн, Шадар сайд, Ерөнхий сайдын албан тушаалаасаа өөрийн хүсэлтээр чөлөөлөгдөх хүсэлт гаргаж байсан юм.

2012 ОН: УИХ-ЫН ГИШҮҮНЭЭС ӨӨРИЙН ХҮСЭЛТЭЭР ЧӨЛӨӨЛӨГДӨВ
У.Хүрэлсүх 2012 оны УИХ-ын сонгуулиар парламентын гишүүнээр сонгогдсон ч бүрэн эрхийн хугацаагаа дуусгалгүй, өөрийн хүсэлтээр чөлөөлөгджээ. Тухайн үед гэр бүлийн шалтгаан, тухайлбал эхнэрээ эмчлүүлэх шаардлагатай болсон хэмээн тайлбарлаж байсан бөгөөд УИХ түүний хүсэлтийг хүлээн авчээ.

2017 ОН: ШАДАР САЙДЫН АЖЛАА ӨГӨХ ХҮСЭЛТ ГАРГАВ
2017 оны наймдугаар сарын 17-нд Шадар сайд У.Хүрэлсүх Ерөнхий сайд Ж.Эрдэнэбатад албан тушаалаасаа чөлөөлөгдөх өргөдөл хүргүүлсэн. Тэрбээр тухайн үеийн Ерөнхий сайдын улс төрийн үйл ажиллагаатай санал нийлэхгүй, цаашид хамтран ажиллах итгэл үнэмшилгүй болсон гэж өргөдөлдөө дурдсан байдаг.
Гэвч түүний хүсэлтийг тухайн үед шууд шийдвэрлээгүй. Улмаар 2017 оны аравдугаар сарын 4-нд Ерөнхий сайдаар томилогдсонтой нь холбогдуулан Шадар сайдын үүрэгт ажлаас чөлөөлжээ.

2021 ОН: ЕРӨНХИЙ САЙДЫН АЛБАН ТУШААЛААС ӨӨРИЙН ХҮСЭЛТЭЭР ОГЦРОВ
2021 оны нэгдүгээр сарын 21-нд У.Хүрэлсүх Ерөнхий сайдын албан тушаалаасаа огцрох саналаа гаргасан. Тухайн үед амаржсан эх, нярай хүүхэдтэй холбоотой эмнэлгийн байгууллагын үйл ажиллагааг эсэргүүцсэн олон нийтийн шүүмжлэл өрнөж, Засгийн газар хариуцлага хүлээх асуудал яригдсан юм.
УИХ-ын чуулганы хуралдаанд оролцсон гишүүдийн 95.2 хувь нь түүний Засгийн газрыг огцруулахыг дэмжсэнээр Ерөнхий сайдын бүрэн эрх нь дуусгавар болсон.

2026 ОН: ЕРӨНХИЙЛӨГЧИЙН АЛБАН ТУШААЛАА ӨГӨХӨӨ МЭДЭГДЭВ
Харин энэ удаа У.Хүрэлсүх өөртэй нь холбоотой гүтгэлэг худал болохыг нотолж, нэр төрөө сэргээлгэхийн тулд Ерөнхийлөгчийн албан тушаалаа өгөхөө мэдэгдсэн тухай мэдээлэл гарлаа.












