Парламент хуралдаж чадахгүйдээ хүрлээ. Асуудал хэлэлцэх танхимгүйдээ биш. Ард түмнийг төлөөлөх гишүүн цөөдсөндөө ч биш. 126 суудалтай атлаа хуралдах ирцээ бүрдүүлж чадсангүй. УИХ-ын чуулганы нэгдсэн хуралдаан өчигдөр буюу 2026.09.17-ны өдөр 14.00 цагт хуралдах байсан ч 126 гишүүнээс 52 нь л цуглаж, ирцэндээ хүрээгүй учир хуралдаагүй. Тэгвэл чуулганы хуралдааныг ирэх долоо хоногийн даваа гаригт буюу энэ сарын 21-нд, баасан гаригийн нэгдсэн хуралдааныг Мягмар гаригт тус тус хуралдуулахаар хойшлуулжээ.126 гишүүнтэй болсон ч улс төрийн талцал, намын дотоод зөрчил, бүлэглэл хоорондын маргаан парламентад хүчтэй ажиглагдаж, бодлогын асуудлаас илүү улс төрийн өрсөлдөөн давамгайлах нөхцөл үүсэж байна.
Гишүүдийн тоог нэмэхэд хариуцлага дагаад нэмэгддэггүйг энэ явдал санууллаа. 126 гэдэг бол хариуцлагаа хувааж бүдгэрүүлэх тоо биш. Иргэдийн татвараар санхүүждэг төрийн эрх барих дээд байгууллага ажлаа хийж чадахгүй боллоо. Ирцгүй бол хуралдахгүй. Хуралдахгүй бол шийдвэр гарахгүй. Шийдвэр гарахгүй бол асуудал хойшилно. Харин асуудал хойшлох бүрийн төлөөсийг парламент биш, эцэст нь иргэд төлдөг.
ADVERTISEMENT
