УИХ-ын гишүүн Э.Батшугар “2027 онд 73 шинэ эмнэлэг барина. Ахмадуудад даралт, чихрийн шижингийн эмийг үнэгүй өгнө. Дэлхийн хамгийн чанартай эм үйлдвэрлэдэг улсуудаас эм оруулж ирнэ” гэжээ.Эмнэлэг барих, иргэдийг чанартай эмээр хангах нь мэдээж шаардлагатай. Гэхдээ төрийн бодлого дандаа “эм оруулж ирнэ, үнэгүй өгнө, эмнэлэг нэмж барина” гэдэг дээр төвлөрөх ёстой юу? ДЭМБ-ын мэдээллээр Монгол Улсын нийт нас баралтын 83 хувийг халдварт бус өвчин эзэлж байна. Үүний 44 хувь нь зүрх, судасны өвчин, 18 хувь нь хорт хавдраас шалтгаалдаг. Монгол Улс элэгний хорт хавдрын өвчлөлөөр дэлхийд нэгдүгээрт орж байна. 2022 онд элэгний хавдрын 2,668 шинэ тохиолдол бүртгэгдэж, 100 мянган хүн тутамд 96.1 тохиолдол ногджээ. Энэ нь дэлхийн дунджаас ойролцоогоор 11 дахин өндөр үзүүлэлт юм. Мөн ходоодны хорт хавдрын өвчлөлөөр Монгол Улс дэлхийд нэгдүгээрт бичигдэж, 2022 онд 1,000 шинэ тохиолдол бүртгэгдсэн байна. 2026 оны эхний таван сарын байдлаар Монгол Улсад 7,308 хүн нас барсан нь өмнөх оны мөн үеэс 89-өөр нэмэгдсэн үзүүлэлт. Нас барагсдын 62.1 хувь нь эрэгтэй байна. Ийм нөхцөлд зөвхөн эм тарааж, эмнэлгийн барилга нэмэх нь өвчлөлийн үр дагавартай тэмцэж буй хэрэг. Харин даралт, чихрийн шижин, зүрх судас, хорт хавдрыг нэмэгдүүлж буй агаарын бохирдол, архи, тамхи, хүнсний чанар, давсны хэрэглээ, хөдөлгөөний дутагдлыг бууруулах бодлого хаана байна вэ? Иргэдийг тогтмол үзлэг, эрт илрүүлэгт хамруулж, элэгний В, С вирус, даралт, чихрийн шижинг эрт илрүүлэх хүртээмжтэй тогтолцоо яагаад бий болохгүй байна вэ? Иргэдээ өвдсөний дараа эмээр угжих бус, өвдөхөөс нь өмнө хамгаал. Эм үнэгүй тараах амлалтаас илүү өвчлүүлэхгүй байх урьдчилан сэргийлэх бодлого Монголд хэрэгтэй байна.
ADVERTISEMENT
