Нийслэлийн Засаг даргын Тамгын газар, Шинжлэх Ухаан, Технологийн Их Сургууль болон Халла их сургууль хооронд 2024 оны 12 дугаар сарын 25-ны өдөр байгуулсан гурван талт хамтын ажиллагааны санамж бичгийн хүрээнд Улаанбаатар метро төслийн инженер, мэргэжилтэнг бэлтгэх чиглэлээр “2+2” хөтөлбөрийг хэрэгжүүлж байна. Тус хөтөлбөр нь метроны ашиглалт, засвар үйлчилгээ, инженер техникийн чиглэлээр ажиллах мэргэжилтнүүдийг бэлтгэх зорилготой бөгөөд ШУТИС-д оюутнууд суралцаж байна. Тус хөтөлбөр нь оюутнуудыг эхний хоёр жилд ШУТИС-д, дараагийн хоёр жилд БНСУ-д суралцуулна.
Энэ хүрээнд “Метро систем” хичээлийн нэг семестрийн сургалтын үр дүнг танилцуулах арга хэмжээг 2026 оны тавдугаар сарын 26-ны өдөр зохион байгуулж, оюутнууд багийн хэлбэрээр судалгаа, тооцоолол, системийн шийдэлд тулгуурласан төслүүдээ танилцууллаа.
Улаанбаатар метро ашиглалтын боловсон хүчин бэлтгэх хөтөлбөр хариуцсан доктор, профессор Хуанбо Жаг хэлэхдээ оюутнуудыг зөвхөн онолын мэдлэгээр хязгаарлахгүйгээр бодит метро төслийг хэрхэн төлөвлөж, хэрэгжүүлэх талаар бие даан сэтгэж, асуудалд шийдэл боловсруулах арга барилд чиглүүлэн ажилласан байна. Уг уралдаант шалгаруултад метроны удирдлага хяналтын инженерчлэл 1-р курсын оюутан Ч. Эрдэнэсувд, Н. Энх-Ундрал, А. Дөлгөөн, В. Гоомарал, С. Мөнхжаргал, Метроны механик ба хөдлөх бүрэлдэхүүний инженерчлэл 1-р курсийн оюутан О.Тэмүүжин нар шалгарсан бөгөөд шилдэг оюутнуудад БНСУ-ын Халла их сургуулийн сургалтын орчин, мэргэжлийн лаборатори болон салбарын бодит үйл ажиллагаатай танилцах боломжийг олгож байгаа аж. Профессорын зүгээс оюутнуудаа дэмжиж, нислэгийн зардлыг хувиасаа санхүүжүүлэн дэмжиж буйгаа илэрхийлсэн.
Энэхүү үйл ажиллагаа нь ирээдүйн метро болон хотын нийтийн тээврийн салбарт ажиллах чадварлаг инженер, техникийн боловсон хүчнийг бэлтгэх бодит сургалтын нэг хэсэг болж байгаагаараа онцлогтой юм. Мөн БНСУ-ын хамгийн анхны хурдны галт тэрэгний бүтээн байгуулалтад оролцсон туршлагатай Халла их сургуулийг хамтын ажиллагааны түнш байгууллагаар сонгосон нь энэхүү хөтөлбөрийн ач холбогдлыг улам нэмэгдүүлж байна.
Энэхүү уулзалт танилцуулгад ШУТИС-ийн сургалт эрхэлсэн проректор Н. Эрдэнэхүү, ШУТИС МИТС-ийн захирал Н. Пүрэвдорж, “Духуа Инженеринг” ХК Ерөнхий менежер Кан Га-ын, Улаанбаатар метро ашиглалтын боловсон хүчин бэлтгэх хөтөлбөр хариуцсан доктор, профессор Хуанбо Жаг “УБ Метро” төслийн Архитектор Х. Елик, УБ Метро төслийн боловсрол сургалт хариуцсан мэргэжилтэн У. Эрдэнэчимэг нар оролцсон.
