Улаанбаатар хотоос 53 км, Зуунмод хотоос 10 км зайд, “Чингис хаан” олон улсын нисэх буудлын орчим Хөшигийн хөндийд, Богд уулын өвөрт байгуулагдах Хүннү хот нь нийслэлийн төвлөрлийг сааруулах, бүс нутгийн тэнцвэртэй хөгжлийг хангах зорилготой шинэ дагуул хотын төсөл юм. Монгол Улсын Засгийн газрын 2022 оны 143 дугаар тогтоолоор Хүннү хотын хөгжлийн ерөнхий төлөвлөгөөг баталсан бөгөөд тус хотыг 150 мянган хүн амтай, 80 мянга орчим ажлын байртай, ухаалаг, ногоон, тогтвортой, орчин үеийн жишиг хот болгон хөгжүүлэхээр төлөвлөж байна. Хотод төр, захиргаа, боловсрол, үйлдвэрлэл, худалдаа, тээвэр логистик, аялал жуулчлалын чиг үүргийг төвлөрүүлэхээр төлөвлөжээ.
Одоогийн байдлаар Хүннү хотын суурь дэд бүтцийн гол ажлууд үе шаттай хэрэгжиж байна. Тухайлбал, цэвэрлэх байгууламжийн бүтээн байгуулалт 40 гаруй хувийн гүйцэтгэлтэй, Сэргэлэн дэд станцын ажил 95 хувьтай үргэлжилж байгаа бол 127.4 км автозамын зураг төсөл, бүтээн байгуулалтын ажил 40 орчим хувийн гүйцэтгэлтэй байна. Сэргэлэн дэд станц нь 110/35/10 кВ-ын 2х40 МВт хүчин чадалтай бөгөөд ашиглалтад орсноор Хүннү хотын эрчим хүчний найдвартай, тогтвортой хангамжийг нэмэгдүүлэхийн зэрэгцээ төвийн бүсийн эрчим хүчний системийн хүчин чадлыг өргөтгөх ач холбогдолтой. Үүнээс гадна хотын эрчим хүчний хэрэгцээг дотоодын эх үүсвэрээр хангах зорилгоор 100 МВт-ын нарны цахилгаан үүсгүүр, 90 МВт хүчин чадалтай, 360 МВт.ц багтаамж бүхий батарей хуримтлуурын станц байгуулахаар төлөвлөж байна.
Хүннү хотод баригдаж буй цэвэрлэх байгууламж нь хоногт 3,000 м³ ахуйн бохир ус цэвэрлэх хүчин чадалтай бөгөөд 35–40 мянган хүн амын бохир усыг татан зайлуулах боломжтой. Барилгын ажлыг 2027 оны IV улиралд бүрэн дуусгахаар ажиллаж байна. Цэвэрлэх байгууламжаас гарсан гүн цэвэршүүлсэн усны 98 хувийг хөрсөнд шингээлгүй, холбогдох аюулгүй байдлын шаардлагыг ханган 8.8 км зайд голын урсгалд нийлүүлэхээр төлөвлөжээ.
Мөн Хүннү хотын дулаан хангамжийг газрын гүний дулааны эх үүсвэрээр хангах боломжийг судалсан байна. Судалгааны үр дүнд Хүннү хотын байршилд газрын гүний дулааны нөөцийг ашиглах боломж өндөр байж болохыг эрдэмтэн, судлаачид тогтоосон байна.
Ийнхүү Хүннү хотын эхний ээлжийн инженерийн болон тээврийн дэд бүтцийг үе шаттайгаар бүрдүүлж, цаашид эдийн засаг, боловсрол, үйлдвэрлэл, худалдаа, логистик болон төр, захиргааны чиг үүргийг хослуулсан шинэ хотын хөгжлийг бий болгохоор ажиллаж байна.
Төслийн хүрээнд олон нийтээс асууж тодруулдаг дараах сэдвээр тайлбар мэдээлэл хүргэж байна.
1. Хүннү хотын гол үзэл санаа нь юу вэ?
Тус хотыг ухаалаг, ногоон, тогтвортой, орчин үеийн жишиг хот болгон хөгжүүлэхээр төлөвлөж байна. Хотод төр, захиргаа, боловсрол, үйлдвэрлэл, худалдаа, тээвэр логистик, аялал жуулчлалын чиг үүргийг төвлөрүүлэхээр төлөвлөжээ.
2. Төслийг төр, хувийн хэвшлийн түншлэлээр хэрэгжүүлэхэд эрсдэлийг төр дангаараа үүрэх нөхцөл үүсэх үү?
Төслийн ТЭЗҮ болон холбогдох судалгаанд үндэслэн эдийн засаг, санхүүгийн үр ашиг, болзошгүй эрсдэлийг урьдчилан тооцно. Эрсдэлийг талуудын хариуцах хүрээнд тодорхойлж, гэрээнд тусган зохистой байдлаар хуваарилах зарчмаар хэрэгжүүлнэ.
3. Цэвэрлэх байгууламж ашиглалтад орсноор хэдэн хүн амын хэрэгцээг хангах вэ?
Хоногт 3,000 м³ ахуйн бохир ус цэвэрлэх хүчин чадалтай тус байгууламж нь 35–40 мянган хүн амын бохир усыг татан зайлуулах боломжтой. Барилгын ажлыг 2027 оны IV улиралд дуусгахаар төлөвлөж байна. Гүн цэвэршүүлсэн усны 98 хувийг аюулгүй байдлын шаардлагыг ханган 8.8 км зайд голын урсгалд нийлүүлэхээр төлөвлөжээ.
