Аяны хүрээнд 2026 оны 10 дугаар сарын 03-ны өдөр “Олон улсын эко цэцэрлэгт хүрээлэн”-д 42 байгууллагын 1,072 хүн найман төрлийн 3,000 мод тарилаа.
Мод тарих өдрүүдэд зориулж Ойн газар Улаанбаатар хотын есөн байршилд найман төрлийн навчит болон шилмүүст модны 400 мянган суулгацын дэмжлэг үзүүлж байна.
Иргэд, байгууллагуудыг тарьц, суулгацаар хангах үзэсгэлэн 10 дугаар сарын 05-18-ны өдрүүдэд болно.
“Тэрбум мод” үндэсний хөдөлгөөний хүрээнд аймгууд 78, уул уурхайн аж ахуйн нэгжүүд 50, төрийн болон хувийн хэвшлийн бусад байгууллага 12, нийт 140 сая модыг шууд болон дүйцүүлэх хэлбэрээр тарьж, ургуулаад байна.
Өнгөрсөн хугацаанд улсын хэмжээнд 113.8 сая тарьц, суулгацын нөөц, 21.6 тонн үрийн нөөцийг бүрдүүлж, 1,264 ойн инженер, 6,354 ойжуулагч, техникч бэлтгэжээ. Ойн салбарт 650 гаруй мэргэжлийн байгууллага байдгийн 43 хувь нь мод үржүүлгийн чиглэлийнх юм.
“Тэрбум мод” үндэсний хөдөлгөөний хүрээнд мод тарихын зэрэгцээ ойн санг хөнөөлт шавж, өвчлөл, доройтлоос хамгаалах ажил үргэлжилж байна.
Энэ жил 16 аймгийн 130 гаруй сумын 2.4 сая га талбайд ойн хөнөөлт шавж тархалтын судалгаа хийхэд 256.5 мянган га талбайд голомт үүссэнийг тогтоосон. Энэ дагуу агаарын хөлөг, үүргийн шүршигч, гэрлэн урхи, механик арга болон дрон ашиглан 133.5 мянган га талбайд хөнөөлт шавжтай тэмцэх ажил хийжээ.
Түүнчлэн Сонгинохайрхан дүүргийн 36, 41 дүгээр хорооны нутаг дэвсгэр дэх Нарангийн энгэр, Баянзүрх дүүргийн 21, 24 дүгээр хорооны нутаг дэвсгэр дэх Цагаан давааны хогийн цэгийг ойжууллаа. Ингэснээр доройтсон газар нөхөн сэргэж, нийслэлийн ногоон байгууламж нэмэгдэн, хөрс, агаарын бохирдол буурч, хотын иргэдийн амьдрах орчны чанар сайжирчээ.
