Улаанбаатар хотын өсөн нэмэгдэж буй цахилгаан, дулааны эрчим хүчний хэрэгцээг хангах ач холбогдолтой Дулааны V цахилгаан станц (ДЦС-5)-ын бүтээн байгуулалт төлөвлөгөөний дагуу эрчимтэй үргэлжилж байна.
Төслийн хүрээнд ДЦС-2-ын талбайг барилгын ажилд бэлтгэх зорилгоор 65 жилийн хугацаанд хуримтлагдсан үнсийг цэвэрлэх ажил хийгдэж байгаа юм. Өнөөдрийн байдлаар хүнд даацын өөрөө буулгагч автомашинаар нийт 197.1 мянган шоо метр үнсийг Морингийн давааны зориулалтын хаягдлын цэгт аюулгүй тээвэрлэн шилжүүлээд байна. Замын хөдөлгөөний ачааллаас шалтгаалан тээвэрлэлтийг оройн 20:00 цагаас өглөөний 08:00 цагийн хооронд зохион байгуулж байгаа аж.
Мөн Дулааны II цахилгаан станцын одоо байгаа дэд бүтцийг түшиглэн шинэ станц барихтай холбоотой инженерийн шугам сүлжээний трассын дагуух газар чөлөөлөлтийн ажил төлөвлөгөөний дагуу хэрэгжиж байна. НИТХ-ын 2025 оны 25/107 дугаар тогтоолд тусгагдсан энэхүү ажлын хүрээнд нийт 26 нэгж талбар газар чөлөөлөлтөд өртсөнөөс 25 аж ахуйн нэгж газраа бүрэн чөлөөлжээ. Ингэснээр газар чөлөөлөлтийн ажил 96 хувийн гүйцэтгэлд хүрээд байна.
Төслийн зураг төслийг “Митайм Интернэйшл” компанийн туслан гүйцэтгэгч болох “Повер Чайна Электрик Повер Инженер” компани боловсруулж байгаа бөгөөд угсралт, суурилуулалтын ажлын суурь болох 19 багц зураг болон зуухны суурийн зураг төслийг хүлээн авсан бөгөөд үндсэн тоног төхөөрөмжүүдийн үйлдвэрлэл графикийн дагуу урагшилж, турбин, генератор, трансформатор зэрэг гол тоноглолын үйлдвэрлэлийн явц 30 орчим хувьд хүрээд байна. Эдгээр тоног төхөөрөмжийг Монгол Улсын эрс тэс уур амьсгалын нөхцөлд найдвартай ажиллах техникийн шаардлагад нийцүүлэн үйлдвэрлэж буй нь төслийн онцлог юм.
ДЦС-5 төслийг 2028 онд бүрэн ашиглалтад оруулахаар төлөвлөсөн. Станц ашиглалтад орсноор 100 мянга орчим өрхийг цахилгаан эрчим хүчээр, 40 мянга орчим өрхийг төвлөрсөн дулаанаар хангах хүчин чадал бий болно. Үүнээс гадна нийслэлийн эрчим хүчний системийн найдвартай ажиллагааг нэмэгдүүлж, өсөн нэмэгдэж буй хэрэглээг дотоодын эх үүсвэрээр хангах, цаашдын хот байгуулалт, орон сууцны шинэ хорооллуудын хөгжлийг дэмжихэд чухал хувь нэмэр оруулах юм.
