Дэлхийн банкнаас зохион байгуулсан “Мега төслийн байгаль орчин, нийгмийн эрсдэлийн удирдлага” сэдэвт сургалт, хэлэлцүүлэгт “Нэгдсэн төслийн удирдлагын газар” ОНӨТҮГ-ын инженер, удирдлагууд хамрагдлаа. Тус сургалтаар дэд бүтцийн томоохон төслүүдийг үр дүнтэй, тогтвортой хэрэгжүүлэхийн тулд хэрхэн байгальд ээлтэй, хүн амын эрсдэл, аюулгүй байдлыг баталгаажуулан төлөвлөж, бэлтгэн хэрэгжүүлэх вэ гэдгийг хөндөж, хэлэлцсэн.
Мега төслийг хэрэгжүүлэхэд Дэлхийн банкны Байгаль орчин, нийгмийн 10 стандарт (БОНС1–БОНС10)-ыг төслийн онцлог, цар хүрээ, нөлөөлөлтэй уялдуулан хэрэгжүүлэх шаардлагатай байдаг. Эдгээр стандарт нь Байгаль орчин, нийгмийн эрсдэлийн үнэлгээ, Хөдөлмөрийн харилцаа, Нөөцийн ашиглалт ба бохирдлын менежмент, Эрүүл мэнд, аюулгүй байдал, Газар чөлөөлөлт, Биологийн олон янз байдал, Соёлын өв, Санхүүгийн зуучлал, Оролцогч талуудын оролцоо болон мэдээллийн ил тод байдлыг хамардаг байна.
Тухайлбал, БОНС5 буюу Газар чөлөөлөлт, албадан нүүлгэн шилжүүлэлттэй холбоотой стандарт нь төслийн улмаас иргэдийг албадан нүүлгэн шилжүүлэхээс аль болох зайлсхийх, зайлшгүй тохиолдолд зохих төлөвлөгөө боловсруулж хэрэгжүүлэх, нөлөөлөлд өртсөн иргэдэд нөхөн олговрыг орлуулах өртгөөр нь цаг тухайд бүрэн олгох, амьжиргааг нь сэргээхэд дэмжлэг үзүүлэх зэрэг нарийвчилсан шаардлагыг тодорхойлсон байдаг. Мөн эмзэг бүлгийн иргэд, өрхийн нөхцөл байдлыг харгалзан тэдний амьжиргаа, амьдралын чанарыг сайжруулахад чиглэсэн нэмэлт арга хэмжээ авахыг чухалчилдаг байна.
Сургалтын үеэр байгаль орчин, нийгмийн эрсдэлийн удирдлага нь төслийн хэрэгжилтийг удаашруулах чагт бус, харин төслийн төлөвлөлт, бэлтгэл ажлын чанарыг сайжруулах, оролцогч талуудын ойлголт, оролцоог нэмэгдүүлэх, болзошгүй эрсдэл, маргааныг урьдчилан тодорхойлон бууруулах, төслийн үр өгөөж, тогтвортой байдлыг хангахад чухал ач холбогдолтой болохыг онцоллоо. Ийнхүү олон улсын стандарт, сайн туршлагад тулгуурласан байгаль орчин, нийгмийн эрсдэлийн удирдлагын талаарх мэдлэг, ойлголтыг нэмэгдүүлэх нь томоохон дэд бүтцийн төслүүдийг хариуцлагатай, хүртээмжтэй, тогтвортой хэрэгжүүлэхэд чухал ач холбогдолтой юм.
