“Монгол Газрын тос боловсруулах үйлдвэр” ТӨХХК нь газрын тос боловсруулах үйлдвэрийн Нарийвчилсан техник, эдийн засгийн үндэслэлийг Энэтхэгийн инженер, мэргэжилтнүүдтэй хамтран боловсруулж, 2018 оны 11 дүгээр сард УУХҮЯ-ны Эрдэс баялгийн мэргэжлийн зөвлөлөөр батлуулсан.
Төслийн менежментийн зөвлөх үйлчилгээний гэрээг 2019 оны 5 дугаар сарын 13-нд Engineers India Limited (EIL) компанитай байгуулж, үйлдвэрийн инженерчлэл, зураг төслийн ажлыг эхлүүлсэн. НТЭЗҮ-ийн тодотголыг технологийн өөрчлөлт, дэлхийн зах зээл дэх үнийн өсөлтийн нөлөөллийг тусган боловсруулж, 2023 оны 9 дүгээр сарын 27-нд Эрдэс баялгийн мэргэжлийн зөвлөлийн өргөтгөсөн хурлаар баталгаажуулсан.
Төсөл нь газрын тос боловсруулах үйлдвэрийн үндсэн байгууламжуудаас гадна цахилгаан станц, ус хангамж, түүхий тос дамжуулах хоолой, агуулах сав, төмөр зам, авто зам зэрэг дэд бүтцийг хамарна. Мөн үйлдвэрийн ажилтнуудад зориулсан 550 айлын орон сууц, сургууль, цэцэрлэг, худалдаа үйлчилгээний төв бүхий “Газрын тосны үйлдвэрийн хотхон”-ыг байгуулахаар төлөвлөсөн.
