Чингэлтэй дүүрэгт суурилуулсан нэг бүр нь 56 сая төгрөгийн өртөгтэй “ухаалаг хогийн сав” олон нийтийн шүүмжлэл дагуулаад байна. Үүнтэй холбогдуулан тус дүүргийн Засаг дарга Н.Мандуул уг байгууламжийн үнэ, зориулалтын талаар тайлбар өглөө.Түүний мэдээлснээр гаднаас харагдах хогийн савны доор 3 шоо метр багтаамжтай хог цуглуулах бункер байрладаг аж. Хөрсөнд бохирдол үүсгэхээс сэргийлж бункерийг зузаан, зэвэрдэггүй төмрөөр хийсэн байна. Мөн 56 сая төгрөгийн үнэд зөвхөн хогийн сав бус:
* газар доорх бункер;
* угсралт, суурилуулалт;
* зураг төсөл;
* гадна тохижилт;
* ухаалаг удирдлагын төхөөрөмж зэрэг зардал багтсан гэж тайлбарлав.
Тус ажлын төсөвт өртгийг Барилгын хөгжлийн төвөөр магадлуулж, материал, ажлын хэмжээ, норм, стандарттай тулган хянуулсан гэдгийг Н.Мандуул онцоллоо.
Харин олон нийтийн зүгээс нэг байгууламжийн 56 сая төгрөгийн өртөг зах зээлийн үнэд нийцэж байгаа эсэх, хэдэн ширхэгийг ямар компаниар гүйцэтгүүлсэн, тендерийн нийт төсөв болон тооцооллыг ил тод болгох шаардлагыг тавьж байна.
Н.Мандуул “Хог хаягдлын менежментийг системээр нь шинэчлэх зорилгоор уг ажлыг эхлүүлсэн. Хийсэн хүн шүүмжлүүлж, бас магтуулдаг” хэмээн байр сууриа илэрхийлжээ.
ADVERTISEMENT
