Бүгд Найрамдах Энэтхэг Улсын Гадаад хэргийн сайд, Эрхэмсэг ноён Субраманьяам Жайшанкар Dr S. Jaishankar Монгол улсад хийж буй албан ёсны айлчлалынхаа хүрээнд Монгол-Энэтхэг ард түмний найрамдлын бэлгэ тэмдэг болсон Газрын тос боловсруулах үйлдвэрт Гадаад харилцааны сайд Б.Батцэцэг, АҮЭБ-ийн сайд Г.Дамдинням, Энэтхэг улсаас Монгол улсад суугаа Элчин сайд А.М.Готсурве нарын хамт зочиллоо.

Үйлдвэрийн бүтээн байгуулалтад оролцож буй Монгол, Энэтхэгийн инженер, мэргэжилтнүүд эрхэм хүндэт зочдыг халуун дотноор хүлээн авч, төслийн хэрэгжилтийг танилцуулав.

Төсөл хэрэгжүүлэгч “Монгол газрын тос боловсруулах үйлдвэр” ТӨХХК-ийн Гүйцэтгэх захирал, доктор Д.Алтанцэцэг Монгол улсын эдийн засагт стратегийн чухал ач холбогдолтой Газрын тос боловсруулах үйлдвэрийг бий болгоход бүх талын тусламж, дэмжлэг үзүүлж буй Энэтхэг улсын Засгийн газар, Энэтхэгийн ард түмэн, тус улсын Гадаад хэргийн сайд доктор С. Жайшанкарт чин сэтгэлийн талархал илэрхийлэв.

Энэтхэгийн болон дэлхийн геополитикийн нөлөө бүхий улс төрчдийн нэг, доктор С.Жайшанкар үйлдвэрийн талбайд хүрэлцэн ирсэн нь алс холын Монгол орны хөгжлийн төсөлд гар бие оролцож буй Төслийн менежментийн зөвлөх “Engineers India Limited”, Ерөнхий гүйцэтгэгч “Megha Engineering and Infrastructures Limited”, төсөл хэрэгжүүлэгч компанийн инженер, ажиллагсдад ихээхэн урам зориг өгсөн, түүхэн үйл явдал боллоо.