Улаанбаатар хотын авто замын хөдөлгөөний саатал түгжрэлийн дийлэнх нь уулзвар хэсгүүдэд төвлөрч байна. Уулзварын нэвтрүүлэх чадвар хязгаарлагдмал байгаа нь иргэдийн амьдралд стресс, амьдралын чанарт сөргөөр нөлөөлж, цаашлаад шатахууны хэрэглээ, агаарын бохирдол, эдийн засгийн алдагдалд хүргэдэг. Тиймээс хамгийн их ачаалалтай уулзваруудын нэвтрүүлэх чадварыг нэмэгдүүлж, тээврийн хэрэгслийн хүлээлт, зогсолтыг бууруулах зорилгоор “Олон түвшний уулзвар” төслийг 2025–2028 онд үе шаттайгаар хэрэгжүүлэхээр ажиллаж байна.
Олон түвшний уулзварын гол зорилго нь уулзвар дээр огтлолцож буй хөдөлгөөний урсгалыг олон түвшинд салгаж, зарим чиглэлийн тээврийн хэрэгслийг гүүрэн гарцаар тасралтгүй нэвтрүүлэх замаар уулзварын түгжрэлийг бууруулахад чиглэж байгаа юм.
Оргил цагт тээврийн хэрэгслийн замын хөдөлгөөний хурд 7–13 км/ц хүрч байгаа бол Улаанбаатар хотын замын хөдөлгөөний ачаалал жилд дунджаар 18 хувиар нэмэгддэг тухай судалгаа бий. Мөн хотын хэвтээ тэнхлэгийн авто замын сүлжээний дагуу өдөрт дунджаар 395,000 хувийн тээврийн хэрэгсэл, босоо тэнхлэгийн авто замын сүлжээний дагуу 295,000 тээврийн хэрэгсэл зорчиж байна. Өөрөөр хэлбэл, хотын хүн ам, тээврийн хэрэгслийн тоо болон хөдөлгөөний ачаалал нэмэгдэж байгаа энэ үед уулзваруудын нэвтрүүлэх чадварыг нэмэгдүүлэх шаардлага зайлшгүй бий болж байна.
“Олон түвшний уулзвар” төслийн эхний шатанд замын хөдөлгөөний ачаалал ихтэй дараах 5 байршилд олон түвшний уулзвар, гүүрийн байгууламжийг барих юм. Үүнд,
1. Сонгинохайрхан дүүргийн Моносын уулзвар
2. Хан-Уул дүүргийн Механик, инженер, тээврийн сургуулийн /МИТС/ уулзвар
3. Баянзүрх дүүргийн Офицерын уулзвар
4. Наадамчдын замын явган хүний гүүр
5. Баянзүрх дүүргийн 42 дугаар хороо, Нарт хотхоны зүүн талын гүүр
Эдгээр таван байршлын Техник, эдийн засгийн үндэслэл /ТЭЗҮ/, нарийвчилсан зураг төсөл болон төсөв боловсруулах ажлыг хийж дуусган, батлаад байна.
