Засгийн газрын нэр хүндийг Ерөнхий сайдын үг, амлалтаар дангаар нь хэмжихгүй. Танхимын гишүүд нь эрх мэдлээ хэрхэн хэрэгжүүлж, гаргасан шийдвэрээ юугаар тайлбарлаж, алдаа дутагдалдаа ямар хариуцлага хүлээж байгаагаар хэмжинэ.
С.Амарсайханы нэр холбогдсон дарамтын мэдээлэл, Т.Аубакирын консулын маргаан, Л.Энх-Амгалангийн салбараас Ерөнхий сайдын хамаарал бүхий сургуультай холбогдсон санхүүжилтийн асуудал, Д.Батлутын хариуцсан салбарт гарсан цэргийн амь насны хохирол, Б.Батцэцэгийн паспорт хэвлэлийн бизнесийн мэдээлэл. Эдгээрийн шинж, нотолгоо, хариуцлагын түвшин өөр ч нэг асуултад хүргэнэ. Н.Учрал сайд нартаа ямар шаардлага тавьж байна вэ?
ХУУЛЬ ЗҮЙН “СААД” С.АМАРСАЙХАНХууль зүй, дотоод хэргийн сайд С.Амарсайхантай холбоотой хамгийн ноцтой асуудал нь иргэнийг дарамталсан гэх мэдээлэл юм. Б.Булнай өөрт нь үзүүлсэн дарамтыг сайдтай холбон ярьсан. Улмаар Ерөнхий сайд Н.Учрал цагдаагийн дэд хурандаа иргэний гэрт очиж, Хууль зүйн сайдын нэрийн өмнөөс хэрэг наймаалцан дарамталж буй бичлэг үзсэн, зүгээр өнгөрөөх ёсгүй гэж мэдэгдсэн.
Үүн дээр ШШГЕГ-ын дарга А.Намсамандын мэдэгдэл нэмэгдлээ. Тэрбээр сайдын шаардлагаар тодорхой хүмүүсийг даргаар томилсон, зарим томилгоог биелүүлэхгүй үед сүрдүүлдэг, сайдын хамаарал бүхий компанийн дөрвөн сая гаруй ам.долларын өр төлбөрийн шийдвэр гүйцэтгэлтэй холбоотой дарамт учирдаг гэж мэдээлэв.
Иргэн хуулийн байгууллагад итгэх эсэх нь ийм асуудлыг хэрхэн шийдэхээс хамаарна. Сайдын нэр холбогдсон учраас шалгалт улам ил тод, хараат бус байх шаардлагатай.
НИЙГЭМ ХАМГААЛЛЫН “СААД” Т.АУБАКИРГэр бүл, хөдөлмөр, нийгмийн хамгааллын сайд Т.Аубакирын хувьд Баян-Өлгийд Казахстаны консулын газар байгуулах тухай яриа, М.Нарантуяа-Наратай хийсэн маргаан бий. Түүний консулын талаар илэрхийлсэн байр суурийг хэвлэлүүд хөндөж, дараа нь Нара гишүүн сайдыг чөлөөлөх санал гаргасан. Есдүгээр сарын 9-ний байнгын хорооны хуралдаанд хоёр талын маргаан хувийн шинжтэй үг хэллэгт шилжсэн байна. Т.Аубакир өөрийнх нь эсрэг мэдэгдлийг үндэс угсаагаар ялгаварласан гэж үзэж, холбогдох байгууллагад хандсанаа тайлбарлажээ. Баян-Өлгий аймаг хуулийн цоорхойг ашиглаж халамж, тэтгэмж авдаг гэх баримт мэдээлэл гарсан. Ийм байхад тус аймгаас сонгогдсон хүн салбарын сайд байж болох уу гэх асуулт үлдэж байна?
БОЛОВСРОЛЫН “СААД” Л.ЭНХ-АМГАЛАНБоловсролын сайд Л.Энх-Амгалангийн асуудал Ерөнхий сайдын нэртэй шууд холбогдов. Н.Учралын хамаарал бүхий “Их засаг кинг” сургуульд 3.5 тэрбум төгрөгийн тоног төхөөрөмжийн санхүүжилт төлөвлөсөн гэх мэдээлэл гарлаа. Л.Энх-Амгалан ил болсон хүснэгтийг ажлын файл бөгөөд төсөв батлагдсаны дараа сургуулиудыг сонгоно гэж тайлбарласан. Тиймээс уг мөнгийг аль хэдийн шилжүүлсэн гэж дүгнэх үндэслэлгүй. Гэвч сургууль сонгоогүй байхад нэр, мөнгөн дүн нь ямар үндэслэлээр хүснэгтэд орсон бэ гэдэг асуулт хэвээр байна. Энэ асуултад сонгон шалгаруулалтын шалгуур, хүсэлт, тооцоо, хурлын баримтаар хариулах учиртай. Гэтэл сайд А.Ариунзаяа болон түүний нөхдийг “Түгжилмаа” хэмээн нэрлэж, улс төрийн дайралт болгон тайлбарлав.
Төсвийн мөнгөний тухай асуултад хэн мэдээлэл тараасныг буруутгах нь хангалтгүй. Ерөнхий сайдаа хамгаалахыг хүсэж байгаа бол Л.Энх-Амгалан өөрийн салбарын шийдвэрийг бүрэн тайлбарлах хэрэгтэй. Баримтгүй өмгөөлөл нь хардлагыг арилгахгүй.
БАТЛАН ХАМГААЛАХЫН “СААД” Д.БАТЛУТБатлан хамгаалахын сайд Д.Батлутын өмнө хүний амь настай холбоотой хариуцлагын асуудал бий. Баянхонгорын 339 дүгээр ангид 19 настай цэрэг амиа алдсан хэрэгтэй холбоотойгоор тавдугаар сард сөрөг хүчний гишүүд түүнийг огцруулах шаардлага тавьсан. Цэрэг нас барсан шалтгаан, анхны мэдээллийн үнэн зөв байдал хэвлэлийн шүүмжлэлийн сэдэв болсон.
Есдүгээр сард өөр нэг алба хаагчийн амь хохирсон асуудлаар Д.Батлут хэрэг цэргийн ангид болоогүй, ар гэрт нь цагдаад хандахыг зөвлөсөн гэж тайлбарлав.
Хэрэг гарсан газар нь мөрдөн шалгах ажиллагаанд ач холбогдолтой. Харин алба хаагч ажилдаа ирэхгүй байхад удирдлага нь хэрхэн ажилласан, эрсдэлийг хэзээ мэдсэн, ямар арга хэмжээ авсан тухай асуултыг орлохгүй. Эцэг эхчүүд хүүхдээ цэрэгт явуулахдаа эрүүл саруул буцааж авах итгэлтэй байх ёстой. Тэр итгэлийг эмгэнэлийн үгээр сэргээхэд хэцүү. Бодит өөрчлөлт, тодорхой хариуцлага шаардлагатай.
ГАДААД ХАРИЛЦААНЫ “СААД”Б.БАТЦЭЦЭГГадаад харилцааны сайд Б.Батцэцэгийн нэр паспорт хэвлэлийн бизнес, төрийн компанийн удирдлага, өмчлөлийн холбоосын тухай мэдээлэлд дурдагдсан. “Өдрийн сонин”-ы нийтлэлд паспорт үйлдвэрлэдэг “Төрийн үнэт цаас хэвлэл” компанийн удирдлагад түүний хамаарал бүхий компанид ажиллаж байсан хүн ажилласан, хувийн хувь эзэмшигчийн удирдлага мөн сайдтай холбоотой гэх асуудлыг хөнджээ. Эдгээр мэдээлэл нь ашиг сонирхлын зөрчил байгаа эсэхийг шалгах үндэс болж байна.
ADVERTISEMENT
